پاکستان کے شہر کراچی میں مفت راشن کی تقسیم کے دوران بھگدڑ سے سولہ خواتین ہلاک ہو گئی ہیں۔یہ واقعہ اس وقت پیش آیا جب کراچی میں واقع کھوڑی گارڈن میں جو کہ جوڑیا بازار میں واقع ہے، مفت راشن کی تقسیم کی جا رہی تھی۔ اطلاعات کے مطابق لوگوں کے رش کی وجہ سے حبس ہو گیا جس کے بعد بھگدڑ مچ گئی اور چودہ خواتین ہلاک ہوگئیں۔ مزید۔۔۔۔

اب نبی کریم ﷺ کی دو احادیث مبارکہ ملاحظہ فرمائیں۔

ایک سیاہ فام غریب شخص مسجد میں جھاڑو لگایا کرتا تھا۔ اس کا انتقال ہو گیا تو صحابہ نے اس کی تدفین کر دی۔

ایک دن رسول اللہ ﷺ نے اسے موجود نہ پایا تو اس کے بارے میں دریافت فرمایا۔ لوگوں نے کہا کہ وہ تو فوت ہو گیا۔
آپ ﷺ نے فریایا؛
مجھے اطلاع کیوں نہیں دی؟
راوی کا بیان ہے کہ لوگوں نے اس کے انتقال کو ایک معمولی واقعہ سمجھتے ہوئےآپ ﷺ کو اطلاع نہ دی تھی۔
آپ ﷺ نے فرمایا؛
مجھے اس کی قبر بتلاؤ، لوگوں نے قبر بتلائی۔ آپ نے قبر پر پہنچ کر اس کی نماز جنازہ ادا کی۔
(حضرت ابو ہریرہ رضی اللہ عنہ۔۔۔۔۔۔۔۔مسلم۔ کتاب الجنائر۔ح۔2215 )

حضرت مصعب بن سعد رحمتہ اللہ علیہ سے روایت ہے کہ نبی کریم ﷺ نے فرمایا؛

تمہیں ضعیفوں اور کمزوروں کی وجہ سے ہی اللہ تعالیٰ کی طرف سے مدد اور روزی ملتی ہے۔
(بخاری۔ح۔2896 )

آج پاکستان میں انشا؍اللہ پہلا روزہ ہوگا۔  اللہ تعالیٰ ہم سب مسلمانوں کو اس ماہ ِ مبارک کی نعمتوں، برکتوں اور ساعتوں سے بھرپور فائدہ اُٹھانے کی توفیق عطا فرمائے اور ہمارے ملک پاکستان اور تمام عالم  ِ اسلام کو رمضان المبارک کے صدقے ترقی و کامرانی اور امن و سلامتی عطا فرمائے۔ آمین!

تمام عالم ِ اسلام کو جشن ِ عید میلاد النبی صلی اللہ علیہ وسلم مبارک ہو۔ اللہ تعالیٰ کا لاکھ لاکھ شکر کہ اس نے ہماری ہدایت  و رہنمائی کے لئے نبی کریم صلی اللہ علیہ وسلم کو اس دنیا میں بھیجا کہ جن کی بدولت آج ہم مسلمان کہلائے جانے کے مستحق ہیں۔ اللہ تعالیٰ سے دعا ہے کہ ہمیں آنحضور صلی اللہ علیہ وسلم کی تعلیمات پر عمل پیرا ہونے کی توفیق عطا ہو!۔۔۔آمین!

اس پر مسرت اور با برکت موقع پر “خوشبو” سے پروین شاکر کی ایک خوبصورت نظم ملاحظہ فرمائیں!

وحی

عجیب موسم تھا وہ بھی ، جب کہ
عبادتیں کور چشم تھیں
اور عقیدتیں اپنی ساری بینائی کھو چکی تھیں
خود اپنے ہاتھوں سے ترشے پتھر کو دیوتا کہہ کے
خیروبرکت کی نعمتیں لوگ مانگتے تھے!
مگر وہ اِک شخص
جو ابھی اپنے آپ پر بھی نہ منکشف تھا
عجیب اُلجھن میں مبتلا تھا
یہ وہ نہیں ہیں، وہ کون ہوگا کا کرب ِ بے نام چکھ رہا تھا!
سو اپنےان نارسا دُکھوں کی صلیب اُٹھائے
غموں کی نایافت شہریت کو تلاش کرتے
وہ شہرِ آزر سے دُور
اپنے تمام لمحے
حرا کے غاروں کے خواب آسا سکوت کو سونپنے لگا تھا
یہ سوچ کا اعتکاف بھی تھا
اور ایک اَن دیکھی رُوح ِ کُل کے وجود کا اعتراف بھی تھا
وہ رات بھی ارتکاز کی ایک رات تھی
جبکہ لمحہ بھر کو
فضا پہ سناٹا چھا گیا
اور ہواؤں کی سانس رُک گئی تھی
ستارہ شب کے دل کی دھڑکن ٹھہر گئی تھی
گریز پا ساعتیں تحیر زدہ تھیں
جیسے وجود کی نبض تھم گئی ہو!
یکایک اِک روشنی جمال و جلال کے سارے رنگ لے کر
فضا میں گونجی
“پڑھو!“
“میں پڑھ نہیں سکوں گا!“
“پڑھو!“
“میں پڑھ نہیں سکوں گا!“
“پڑھو!“
“(مگر) میں کیا پڑھوں؟“
پڑھو۔۔۔۔تم اپنے (عظیم) پروردگار کا نام لے کے
جو سب کو خلق کرتا ہے
جس نے انسان کو بنایا ہے منجمد خون سے
پڑھو (کہ) تمھارا پروردگار بے حد کریم ہے
(اور) جس نے تم کو قلم سے تعلیم دی
اُسی نے بتائیں انسان کو وہ باتیں
کہ جن کو وہ جانتا نہیں تھا۔۔۔۔۔۔“

فضائے بے نطق جیسے اقراء کا ورد کرنے لگی تھی
وہ سارے لفظ ، جو
تیرگی کے سیلاب میں کہیں بہہ چکے تھے
پھر روشنی کی لہروں میں
واپسی کے سفر کا آغاز کر رہے تھے
دریچہ بے خیال میں
آگہی کے سُورج اُتر رہے تھے
اس ایک پل میں
وہ میرا اُمی
مدینہ العلم بن چکا تھا!
*******

تمام عالم ِ اسلام کو نیا اسلامی سال بہت بہت مبارک ہو!۔۔۔آئیے اللہ تعالیٰ سے دعا کرتے ہیں کہ یہ نیا سال ہمارے لئے اور پوری اُمت مسلمہ کے لئے امن و سلامتی اور خیر و برکت کا باعث بنے۔ آمین!

ہمارے پیارے نبی صلی اللہ علیہ وسلم کو اللہ تعالیٰ  کے دین کی دعوت عام کرنے پر اللہ تعالیٰ  کے دین کے دشمنوں نے طرح طرح کی تکالیف پہنچائیں اور آپ صلی اللہ علیہ وسلم  کی راہ میں کانٹے بچھائے۔ رسول اللہ صلی اللہ علیہ وسلم ہر تکلیف و مشقت برداشت کرتے ہوئے دشمنان اسلام کے حق میں ہدایت کی دعا کرتے رہے۔ اللہ تعالیٰ  نے آپ کو مکہ مکرمہ سے مدینہ منورہ ہجرت کرنے کا حکم دیا۔ دین کی خاطر اپنا وطن چھوڑ کر دوسرے وطن کا سفر کرنے کو اسلام کی اصطلاح میں ہجرت  کہتے ہیں۔ اسلامی سال کو ہجرت نبوی صلی اللہ علیہ وسلم کا سال کہا جاتا ہے اور یہ سال ہجرت نبوی صلی اللہ علیہ وسلم کی یاد تازہ کرتا ہے۔

تقویم سنہ ہجری کی ابتدا خلیفہ دوم حضرت عمر رضی اللہ عنہ کے دور حکومت میں ہوئی۔ حضرت عمر رضی اللہ عنہ سے پہلے نہ سنہ تھا نہ سال۔ مسلمان کسی نہ کسی خاص واقعہ سے سال کا حساب لگایا کرتے تھے۔ مثال کے طور پر ہاتھیوں کے حملے کے حوالے سے عام الفیل وغیرہ۔۔۔غرض مہینے مقرر تھے مگر سنہ نہ تھا۔ جب حضرت عمر رضی اللہ عنہ خلیفہ ہوئے تو سنہ ١٦ میں ایک دستاویز دستخط کے لئے آپ کے سامنے پیش کی گئی۔ اس پر تاریخ کی جگہ صرف شعبان کا لفظ لکھا ہوا تھا۔ یہ بات حضرت عمر رضی اللہ عنہ کو کھٹکی۔ آپ رضی اللہ عنہ نے فرمایا یہ کیوں کر معلوم ہو کہ اس سے گزرا ہوا شعبان سمجھا جائے یا موجودہ شعبان؟  آپ رضی اللہ عنہ نے اسی وقت مجلس شوریٰ  بلائی اور اس کے سامنے یہ مسئلہ پیش کیا۔ سب نے طے کیا کہ تاریخ، مہینہ اور سال سب ہونا چاہیئے۔ لیکن ایک بات پھر رہ گئی کہ سنہ کی ابتدا کب سے کی جائے؟ سب نے اپنی اپنی رائے دی لیکن حضرت علی رضی اللہ عنہ کی رائے کو سب نے قبول کر لیا۔ آپ رضی اللہ عنہ کی رائے تھی کہ اسے پیارے نبی صلی اللہ علیہ وسلم کی ہجرت سے شروع کیا جائے۔ اس طرح سنہ ہجری کی ابتدا ہوئی۔

اس طرح ہر نیا اسلامی سال ہمیں  ہمارے پیارے نبی صلی اللہ علیہ وسلم کی ہجرت کی یاد دلاتا ہے۔ ہمیں اس بات کا ہمیشہ خیال رکھنا چاہیئے کہ سنہ عیسوی (انگریزی) کے ساتھ ساتھ اسلامی مہینوں کے نام بھی یاد رکھیں اور اپنی خط و کتابت میں سنہ ہجری لکھنا بھی یاد رکھیں!

الحمد اللہ!۔۔۔۔۔تمام اُمت مسلمہ کو ایک بار پھر رمضان المبارک کی روح پرور ساعتوں سے مستفید ہونے کا موقع مل رہا ہے۔ اس نعمت خداوندی کا جتنا بھی شکر ادا کیا جائے وہ کم ہے۔

اللہ تعالیٰ ہم سب مسلمانوں کو اس ماہ ِ مبارک کی نعمتوں، برکتوں اور ساعتوں سے بھرپور فائدہ اُٹھانے کی توفیق عطا فرمائے اور ہمارے ملک پاکستان اور تمام عالم  ِ اسلام کو رمضان المبارک کے صدقے ترقی و کامرانی اور امن و سلامتی عطا فرمائے۔ آمین!

عزیزقارئین!۔۔۔۔ مطالعہ حدیث مراسلاتی کورس کے بارے میں شوبی نامہ پر پہلے لکھ چکا ہوں۔ الحمداللہ میں نے یہ کورس مکمل کر لیا ہے۔ مجھے اس کورس کی تکمیل پر مارک شیٹ اور سند (سرٹیفیکیٹ) بھی موصول ہو گئی ہے۔ اس کورس کی ساری بارہ کتابوں، مارک شیٹ اور سرٹیفیکیٹ کی تصاویر پیش کر رہا ہوں۔ اس کا مقصد اپنی واہ واہ سننا ہرگز نہیں ہے!۔۔۔۔۔۔۔۔تصاویر پیش کرنے کا مقصد صرف یہ ہے کہ قارئین کے اندر بھی اس مفید کورس کی افادیت اور ترغیب پیدا کی جاسکے۔ اللہ کرے کہ مجھ سمیت سب مسلمانوں کو احادیثِ صحیحہ پر عمل پیرا ہونے کی توفیق عطا ہو۔۔۔۔۔!

’’مطالعہ حدیث مراسلاتی کورس‘‘ کے بارے میں جاننے کے لئے میری سابقہ پوسٹ ملاحظہ فرمائیں!۔۔۔۔۔۔۔۔۔شکریا!!!

نماز استخارہ کا مسنون اور مستند طریقہ پڑھنے کے لیے ذیل کے امیج پر کلک کریں۔ جب امیج مکمل نظر آنے لگے تو اسے اپنے کمپیوٹر میں محفوظ کر لیں!

سورۃ المومن کی آیت ۳۹ میں ارشادِ باری تعالیٰ ہے:-

’’اے بھائیو ! یہ دنیوی زندگی محض چند روزہ ہے اور (اصل) ٹھہرنے کا مقام توآخرت ہے‘‘

اس فانی و زائل زندگی اور چند روزہ عیش و بہار میں پڑ کر آخرت کو نہ بھول جاؤ ۔ دنیا کی زندگی بہرحال بھلی بُری طرح ختم ہونے والی ہے۔ اس کے بعد وہ زندگی شروع ہو گی، جس کا کبھی خاتمہ نہ ہو گا!۔ ۔ ۔ عاقل کا کام یہ ہے کہ یہاں رہتے ہوئے اس کی درستگی کی فکر کرے ورنہ ہمیشہ کی تکلیف میں مبتلا رہنا پڑے گا!۔ ۔ ۔
؂ اب تو گھبرا کے یہ کہتے ہیں کہ مر جائیں گے
مر کے بھی چین نہ پایا تو کدھر جائیں گے؟

٭۔ ۔ ۔ ٭

نیا اسلامی سال 1429 ھجری بہت بہت مبارک ہو۔ اللہ تعالیٰ اس نئےاسلامی سال کو امّت مسلمہ کے لیے مبارک کرے!۔۔۔۔۔۔۔خصوصاََ پاکستان کے لئے یہ نیا سال امن و آشتی کا سال ثابت ہو۔ آمین!

جب کوئی فرد اصلاح ِ معاشرہ کی بات کرتا ہے تو اس کی عقل و شعور اُسے یہ احساس دلاتے ہیں کہ اصلاح کا عمل پہلے اپنی ذات سے شروع کیا جائے۔ افرادِ معاشرہ کی اصلاح کے لیے زبانی دعوے اور نصیحتیں کارگر نہیں ہوتیں بلکہ اس کے لیے انسان کو سراپا اخلاق اور مہرومروّت بن کر رہنا پڑتا ہے۔

حضرت امام جعفر صادق رحمتہ اللہ علیہ فرماتے ہیں:

’’لوگوں کے معلّم اور ہدایت کنندہ بنو! زبان سے نہیں ، بلکہ اپنے اعمال، رفتار اور کردار سے۔‘‘

اسلام دین و دنیا کی وحدت اور ہمہ گیر توازن کی اہمیت پر زور دیتا ہے۔ اسلام کی تعلیمات میں ایسی کوئی چیز موجود نہیں جو علم اور عقل کے معیار پر پوری نہ اُترتی ہو۔ اسلام کے نزدیک ہر نفس اپنے اعمال کا خود ذمہ دار ہے اور بہترین شخص وہ ہے جو دوسروں کے لیے زیادہ فائدہ مند ہو۔ اسلام نے باہمی تعلّقات اور معاشرے کی اصلاح و سدھار کے لیے حقوق و فرائض کے جو دائرے متعین کیے ہیں ان کی بنیاد احسان اور حسن ِ سلوک پر رکھی گئی ہے تاکہ معاشرے میں زبانی نصیحت و وعظ کے بجائے عملی طور پر لوگ ایک دوسرے کو دیکھ کر اپنے احوال کی اصلاح کریں۔

اسلام ہمیں یہ درس دیتا ہے کہ پیار و محبت، ایثار و قربانی اور عزت و احترام کا دائرہ ہم محض مسلمانوں تک محدود نہ رکھیں بلکہ تمام انسانوں کے علاوہ حیوانات اور ہر ذی حیات کو اس سے راحت و آرام پہنچائیں۔ یہی اسلام کا مقصدِ عظیم ہے۔

نوٹ: میرا مندرجہ بالامضمون روحانی ڈائجسٹ کے جنوری 2008 عیسوی کے تازہ شمارے میں شائع ہوا ہے۔ اس مضمون کا عکس اور روحانی ڈائجسٹ کے سرورق کا عکس بھی پوسٹ کر رہا ہوں!